ଭୁବନେଶ୍ୱର: ଯୁବବର୍ଗଙ୍କ ସେବା, କରୁଣା ଏବଂ ସାମାଜିକ ଦାୟିତ୍ୱବୋଧ ଦେଶର ଭବିଷ୍ୟତ ନିର୍ମାଣ କରିବ ବୋଲି ମାନ୍ୟବର ରାଜ୍ୟପାଳ ଡ. ହରି ବାବୁ କମ୍ଭମପାଟି କହିଛନ୍ତି l ମଙ୍ଗଳବାର ଦିନ ରମା ଦେବୀ ମହିଳା ବିଶ୍ୱବିଦ୍ୟାଳୟରେ ରାଜ୍ୟସ୍ତରୀୟ ଯୁବ ରେଡକ୍ରସ୍ ଶିକ୍ଷା-ତଥା-ପ୍ରଶିକ୍ଷଣ ଶିବିରକୁ ମୁଖ୍ୟ ଅତିଥି ଭାବେ ଉଦଘାଟନ କରିବା ଅବସରରେ ରାଜ୍ୟପାଳ ଏହା କହିଛନ୍ତିl ଏହି ଅବସରରେ ଉଦବୋଧନ ଦେଇ ରାଜ୍ୟପାଳ କହିଛନ୍ତି ଯେ ଯୁବପିଢ଼ି ଗୋଷ୍ଠୀର ମଙ୍ଗଳ କରିବା, ଦୁର୍ବଳ ଲୋକଙ୍କୁ ସୁରକ୍ଷା ଦେବା ଏବଂ ଅର୍ଥପୂର୍ଣ୍ଣ ସାମାଜିକ ପରିବର୍ତ୍ତନ ଆଣିବା ପାଇଁ ଅପାର ସାମର୍ଥ୍ୟ ରଖନ୍ତି। ସମାଜର ସେବା ହେଉଛି ମାନବ ଜୀବନର ସବୁଠାରୁ ଉତ୍କୃଷ୍ଟ ଅଭିବ୍ୟକ୍ତିl ଏହା ମୂଲ୍ୟବୋଧ, ଚରିତ୍ର ଏବଂ କର୍ତ୍ତବ୍ୟର ଏକ ଦୃଢ଼ ଭାବନା ଗଠନ କରିବା ସହିତ ଦାତା ଏବଂ ଗ୍ରହୀତା ଉଭୟଙ୍କୁ ମଜବୁତ କରେ। ଗୋଟିଏ ରାଷ୍ଟ୍ର କେବଳ ଭୌତିକ ପ୍ରଗତି ମାଧ୍ୟମରେ ନୁହେଁ ବରଂ ନୈତିକ ଶକ୍ତି, ସାମାଜିକ ସମନ୍ୱୟ ଏବଂ ସାମୂହିକ ଦାୟିତ୍ୱ ମାଧ୍ୟମରେ ଉନ୍ନତି କରେ। ଛାତ୍ରଛାତ୍ରୀମାନଙ୍କୁ ସେବା ମାନସିକତା ରଖି ସେବାକୁ ସେମାନଙ୍କ ଜୀବନର ଏକ ଅବିଚ୍ଛେଦ୍ୟ ଅଂଶ କରିବାକୁ ରାଜ୍ୟପାଳ ଆହ୍ୱାନ ଜଣାଇଥିଲେl
ରେଡକ୍ରସର ଭୂମିକା ଉପରେ ଆଲୋକପାତ କରି ରାଜ୍ୟପାଳ ଏହାକୁ ମାନବତା, ନିରପେକ୍ଷତା ଏବଂ ସ୍ୱେଚ୍ଛାକୃତ ସେବାର ଏକ ବିଶ୍ୱ ପ୍ରତୀକ ଭାବରେ ବର୍ଣ୍ଣନା କରିଛନ୍ତି। ବିପର୍ଯ୍ୟୟ ପରିଚାଳନା ସ୍ୱାସ୍ଥ୍ୟ ସଚେତନତା, ପ୍ରାଥମିକ ଚିକିତ୍ସା, ସଡ଼କ ସୁରକ୍ଷା, ରକ୍ତଦାନ କ୍ଷେତ୍ରରେ ଭାରତ ଏବଂ ଓଡ଼ିଶାରେ ଏହାର ଗୁରୁତ୍ୱପୂର୍ଣ୍ଣ ଅବଦାନ ସମ୍ପର୍କରେ ଉଲ୍ଲେଖ କରିଥିଲେ। ଭାରତୀୟ ରେଡକ୍ରସ୍ ସୋସାଇଟି ଓଡ଼ିଶା ରାଜ୍ୟ ଶାଖା ଏହାର କାର୍ଯ୍ୟାଧାରାକୁ ତୃଣମୂଳ ସ୍ତରରେ ବ୍ୟାପକ କରିଥିବାରୁ ରାଜ୍ୟପାଳ ପ୍ରଶଂସା କରିଥିଲେ l ଏତଦବ୍ୟତୀତ ବାତ୍ୟା, ବନ୍ୟା, ମହାମାରୀ ଏବଂ ଅନ୍ୟାନ୍ୟ ଜରୁରୀକାଳୀନ ପରିସ୍ଥିତିରେ ରେଡକ୍ରସର ସ୍ବେଛାସେବୀ ଆଗଧାଡ଼ିରେ ରହି ସେବା କରୁଥିବାରୁ ରାଜ୍ୟପାଳ ପ୍ରଶଂସା କରିଛନ୍ତି l
ଯୁବ ରେଡକ୍ରସକୁ ରେଡକ୍ରସ୍ ଆନ୍ଦୋଳନର ମେରୁଦଣ୍ଡ ଭାବରେ ବର୍ଣ୍ଣନା କରି ରାଜ୍ୟପାଳ କହିଛନ୍ତି ଯେ,ଏହାର ସ୍ୱେଚ୍ଛାସେବୀମାନେ ପ୍ରକୃତରେ ଅନ୍ୟମାନଙ୍କ ପାଉଁ ସେବା ଭାବନାକୁ ପ୍ରତିଫଳିତ କରନ୍ତି l ‘ସୁସ୍ଥ ନାରୀ ସଶକ୍ତ ଓଡ଼ିଶା’ କାର୍ଯ୍ୟକ୍ରମରେ ୟୁଥ ରେଡକ୍ରସର ପଦକ୍ଷେପ ପ୍ରଶଂସନୀୟ l ଯାହାର ଲକ୍ଷ୍ୟ ହେଉଛି ଛାତ୍ରୀମାନଙ୍କ ମଧ୍ୟରେ ରକ୍ତହୀନତା ଦୂର କରିବା, ବିଶେଷକରି ଆକାଂକ୍ଷୀ ଏବଂ ଦୂରଦୂରାନ୍ତ ଜିଲ୍ଲାଗୁଡ଼ିକରେ ଲିଙ୍ଗଗତ ସମାନତା, ସାମାଜିକ ନ୍ୟାୟ ଏବଂ ଅନ୍ତର୍ଭୁକ୍ତିମୂଳକ ବିକାଶ ପାଇଁ ଏକ ଅର୍ଥପୂର୍ଣ୍ଣ ପଦକ୍ଷେପ ଗ୍ରହଣ କରିବା। ସ୍ୱେଚ୍ଛାକୃତ ରକ୍ତଦାନରେ ୟୁଥ ରେଡକ୍ରସର ନିରନ୍ତର ପ୍ରୟାସକୁ ମଧ୍ୟ ପ୍ରଶଂସା କରି ଦାନ କରାଯାଉଥିବା ପ୍ରତ୍ୟେକ ୟୁନିଟ୍ ରକ୍ତ ଜୀବନ, ଆଶା ଏବଂ କରୁଣାର ଉପହାର ବୋଲି ରାଜ୍ୟପାଳ କହିଛନ୍ତି।
ଏହି ତାଲିମ କାର୍ଯ୍ୟକ୍ରମ ଛାତ୍ରଛାତ୍ରୀମାନଙ୍କୁ ପ୍ରାଥମିକ ଚିକିତ୍ସା, ବିପର୍ଯ୍ୟୟ ପ୍ରସ୍ତୁତି, ସଡ଼କ ସୁରକ୍ଷା, ସ୍ୱାସ୍ଥ୍ୟ ସଚେତନତା ଏବଂ ସମାଜ ସେବା କ୍ଷେତ୍ରରେ ଜୀବନ ରକ୍ଷାକାରୀ କୌଶଳ ପ୍ରଦାନ କରେ, ଯାହା ସେମାନଙ୍କୁ ଜରୁରୀକାଳୀନ ପରିସ୍ଥିତି ଏବଂ ଦୈନନ୍ଦିନ ଜୀବନରେ ପ୍ରଭାବଶାଳୀ ଭାବରେ ସକ୍ଷମ କରିଥାଏ ବୋଲି ରାଜ୍ୟପାଳ କହିବା ସହିତ ଏହିପରି ସେବା କାର୍ଯ୍ୟ ସିଧାସଳଖ ଏକ ବିକଶିତ ଓଡ଼ିଶା ଏବଂ ଏକ ବିକଶିତ ଭାରତ ଗଠନରେ ଯୋଗଦାନ କରେ।
କାର୍ଯ୍ୟକ୍ରମରେ ଉଚ୍ଚଶିକ୍ଷା ନିର୍ଦ୍ଦେଶକ କାଳୀପ୍ରସନ୍ନ ମହାପାତ୍ର ଏବଂ ରମା ଦେବୀ ମହିଳା ବିଶ୍ୱବିଦ୍ୟାଳୟର ଭାଇସ ଚାନ୍ସେଲର ଚଣ୍ଡୀ ଚରଣ ରଥ ମଧ୍ୟ ବକ୍ତବ୍ୟ ପ୍ରଦାନ କରିଥିବାବେଳେ ଭାରତୀୟ ରେଡ଼କ୍ରସ ସସୋସିଟି ଓଡ଼ିଶା ରାଜ୍ୟ ଶାଖାର ଅବୈତନିକ ସଚିବ ଗଣେଶ ଚନ୍ଦ୍ର ପାତ୍ର ସ୍ୱାଗତ ଭାଷଣ ପ୍ରଦାନ କରିଥିଲେ l
