ଭୁବନେଶ୍ୱର : ଗୃହନିର୍ମାଣ ଓ ନଗର ଉନ୍ନୟନ ବିଭାଗ ପ୍ରମୁଖ ସଚିବ ଉଷା ପାଢ଼ୀ ରାତିରେ ଭୁବନେଶ୍ୱର ସହରର ବିଭିନ୍ନ ସ୍ଥାନରେ ଚାଲୁଥିବା ସ୍ୱଚ୍ଛତା କାର୍ଯ୍ୟର କ୍ଷେତ୍ର ପରିଦର୍ଶନ ସହିତ ସମୀକ୍ଷା କରିଥିଲେ। ଏହି ପରିଦର୍ଶନ ସମୟରେ ତାଙ୍କ ସହ ଭୁବନେଶ୍ୱର ମହାନଗର ନିଗମର କମିଶନର ଚଞ୍ଚଳ ରାଣା , ସାନିଟେସନ ଉପ କମିଶନର ଏନ୍ ଗଣେଶ ବାବୁ ଓ ଅନ୍ୟାନ୍ୟ ଅଧିକାରୀମାନେ ଉପସ୍ଥିତ ଥିଲେl ରାତ୍ରିକାଳୀନ ପରିଦର୍ଶନ ସମୟରେ ପ୍ରମୁଖ ସଚିବ ଶ୍ରୀମତୀ ପାଢୀ ବାଣିଜ୍ୟିକ ଓ ଯାନ୍ତ୍ରିକ ସ୍ୱୀପିଂ କାର୍ଯ୍ୟର ସମ୍ପୂର୍ଣ୍ଣ ଅବଲୋକନ କରି ସ୍ୱଚ୍ଛତା ବ୍ୟବସ୍ଥାର ପ୍ରଭାବଶୀଳତା, କାର୍ଯ୍ୟ ପ୍ରଣାଳୀ ଓ କ୍ଷେତ୍ର ଆବରଣକୁ ମୂଲ୍ୟାଙ୍କନ କରିଥିଲେ। ସେ କାର୍ଯ୍ୟରତ ସ୍ୱଚ୍ଛତା କର୍ମଚାରୀଙ୍କ ସହ ଆଲୋଚନା କରି ତାଙ୍କ ନିଷ୍ଠା ଓ ପରିଶ୍ରମ ପ୍ରତି ସ୍ୱୀକୃତି ଜଣାଇଥିଲେ।
ଶ୍ରୀମତୀ ପାଢ଼ୀ ରାତି ହେଉ କି ଦିନ—ସହରକୁ ସ୍ୱଚ୍ଛ, ସୁଚିତ୍ର ଓ ସୁସ୍ଥ ରଖିବା ପାଇଁ ଅବିରତ ଭାବେ କାର୍ଯ୍ୟରତ ସ୍ୱଚ୍ଛତା କର୍ମଚାରୀ ଓ ବିଏମ୍ସି କର୍ମକର୍ତ୍ତାଙ୍କ ପ୍ରଶଂସା କରିଥିଲେ। ସେ ଯାନ୍ତ୍ରିକ ସ୍ୱଚ୍ଛତା ପ୍ରଣାଳୀର କାର୍ଯ୍ୟକାରିତାକୁ ଉଲ୍ଲେଖ କରି ସହରର ସ୍ୱଚ୍ଛତା ମାନକୁ ଆହୁରି ସୁଦୃଢ଼ କରିବା ପାଇଁ ନିୟମିତ ଓ ସୁସଂଗଠିତ ସଫାଇ କାର୍ଯ୍ୟ ଅତ୍ୟାବଶ୍ୟକ ବୋଲି କହିଥିଲେ। ଏହି ପରିଦର୍ଶନ ରାଜ୍ୟ ସରକାରଙ୍କ ସହରୀ ସ୍ୱଚ୍ଛତା ବ୍ୟବସ୍ଥା ସୁଦୃଢ଼ିକରଣ, ସେବା ଗୁଣମାନ ବୃଦ୍ଧି ଓ ନାଗରିକମାନଙ୍କ ପାଇଁ ସ୍ୱଚ୍ଛ, ସୁସ୍ଥ ଓ ବାସଯୋଗ୍ୟ ପରିବେଶ ସୁନିଶ୍ଚିତ କରିବା ପ୍ରତି ସରକାରଙ୍କ ଦୃଢ଼ ସଙ୍କଳ୍ପକୁ ପୁନରୁଚ୍ଚାରଣ କରେ।
