ଭୁବନେଶ୍ୱର: ରାଜ୍ୟ ସରକାରଙ୍କ ଶିକ୍ଷକ ପ୍ରଶିକ୍ଷଣ ଅନୁଷ୍ଠାନଗୁଡ଼ିକ ଦ୍ୱାରା ଦାଖଲ କରାଯାଇଥିବା ଅନୁପାଳନ ରିପୋର୍ଟ ଯାଞ୍ଚ ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନର ଆବଶ୍ୟକତା ନାହିଁ ବୋଲି ସ୍ପଷ୍ଟ କରିଛି ଇ.ଆର୍.ସି (ERC)।ଓଡ଼ିଶାର ଶିକ୍ଷକ ପ୍ରଶିକ୍ଷଣ ଅନୁଷ୍ଠାନ (Teacher Education Institution) ଗୁଡ଼ିକ ପାଇଁ ଏହା ଏକ ବଡ଼ ଆଶ୍ୱସ୍ତିକର ଖବର।
ଜାତୀୟ ଶିକ୍ଷକ ଶିକ୍ଷା ପରିଷଦ (NCTE), ନୂଆଦିଲ୍ଲୀର ପୂର୍ବାଞ୍ଚଳ କମିଟି (ERC) ଅକ୍ଟୋବର ୧, ୨୦୨୬ ରେ ଅନୁଷ୍ଠିତ ଏହାର ୪୧୦ତମ ବୈଠକରେ ରାଜ୍ୟର ସମ୍ପୃକ୍ତ ସମସ୍ତ ୧୫ଟି ଶିକ୍ଷକ ପ୍ରଶିକ୍ଷଣ ଅନୁଷ୍ଠାନ ବିରୋଧରେ ଜାରି ହୋଇଥିବା ‘କାରଣ ଦର୍ଶାଅ’ ପ୍ରକ୍ରିୟାକୁ ରଦ୍ଦ କରିବାକୁ ନିଷ୍ପତ୍ତି ନେଇଛନ୍ତି। ଏନ୍.ସି.ଟି.ଇ ନିୟମ ଅନୁଯାୟୀ ସମ୍ପୃକ୍ତ ବିଶ୍ୱବିଦ୍ୟାଳୟଗୁଡ଼ିକ ଦ୍ୱାରା ଅନୁମୋଦିତ ଅଧ୍ୟାପକମାନଙ୍କ ତାଲିକା ଏବଂ ଅନୁଷ୍ଠାନଗୁଡ଼ିକ ଦ୍ୱାରା ଦାଖଲ କରାଯାଇଥିବା ଉତ୍ତରକୁ କମିଟି ବିସ୍ତୃତ ଭାବରେ ଯାଞ୍ଚ କରିଥିଲେ। ସମସ୍ତ ଯାଞ୍ଚ ପରେ ୧୫ଟି କଲେଜ ବିରୋଧରେ ଥିବା ‘କାରଣ ଦର୍ଶାଅ’ ପ୍ରକ୍ରିୟାକୁ ରଦ୍ଦ କରିବା ପାଇଁ ଏନ୍.ସି.ଟି.ଇ (NCTE) ନିଷ୍ପତ୍ତି ନେଇଛି।
ଏହି ନିଷ୍ପତ୍ତି ରାଜ୍ୟ ସରକାରଙ୍କ ଉଚ୍ଚଶିକ୍ଷା ବିଭାଗ, ସମ୍ପୃକ୍ତ ଶିକ୍ଷକ ପ୍ରଶିକ୍ଷଣ ଅନୁଷ୍ଠାନ ଏବଂ ସମ୍ପୃକ୍ତ ବିଶ୍ୱବିଦ୍ୟାଳୟଗୁଡ଼ିକ ମଧ୍ୟରେ ଥିବା ଉତ୍ତମ ସମନ୍ୱୟ ପ୍ରୟାସକୁ ପ୍ରତିଫଳିତ କରିଛି। ଏହା ରାଜ୍ୟରେ ବି.ଏଡ୍. (B.Ed.) ଏବଂ ଏମ୍.ଏଡ୍. (M.Ed.) ପାଠ୍ୟକ୍ରମରେ ଅଧ୍ୟୟନ କରୁଥିବା ଛାତ୍ରଛାତ୍ରୀ, ଅଧ୍ୟାପକ ଏବଂ ଶିକ୍ଷାନୁଷ୍ଠାନଗୁଡ଼ିକ ପାଇଁ ନିଶ୍ଚିତତା ସହ ବଡ଼ ଆଶ୍ୱସ୍ତି ଆଣିଦେଇଛି।
