ଭୁବନେଶ୍ୱର : ଓଡ଼ିଶାର ଗରିମା ପଦକ୍ଷେପ ଅଧୀନରେ “ମୁଖ୍ୟ ପରିମଳ କର୍ମଚାରୀଙ୍କ ସମ୍ମାନ, ନିରାପତ୍ତା ଏବଂ ଅନ୍ତର୍ଭୁକ୍ତୀକରଣ ସୁନିଶ୍ଚିତ କରିବା” ଉପରେ ଦୁଇଦିନିଆ ଜାତୀୟ ସମ୍ମିଳନୀ ଉଦଯାପିତ ହୋଇଛି। ଉଦଯାପନୀ ଅଧିବେଶନରେ ମୁଖ୍ୟ ଅତିଥି ଭାବେ ରାଜ୍ୟ ଗୃହନିର୍ମାଣ ଓ ନଗର ଉନ୍ନୟନ ବିଭାଗ ମନ୍ତ୍ରୀ ଡ. କୃଷ୍ଣଚନ୍ଦ୍ର ମହାପାତ୍ର ଯୋଗ ଦେଇ ପ୍ରମୁଖ ପରିମଳ କର୍ମଚାରୀଙ୍କ ସୁରକ୍ଷା ଦିଗରେ ସେମାନଙ୍କ ଅବଦାନକୁ ସ୍ୱୀକୃତି ଦେଇ ସମ୍ବର୍ଦ୍ଧିତ କରିଥିଲେ। ଏହା ପରିମଳ କାର୍ଯ୍ୟରେ ଅଂଶୀଦାରମାନଙ୍କୁ ସ୍ୱୀକୃତି ଦେବାରେ ସରକାରଙ୍କ ପ୍ରତିବଦ୍ଧତାକୁ ଦର୍ଶାଉଛି। ଗୃହନିର୍ମାଣ ଓ ନଗରଉନ୍ନୟନ ବିଭାଗର ପ୍ରମୁଖ ଶାସନ ସଚିବ ଉଷା ପାଢ଼ୀ କହିଥିଲେ ଯେ ପ୍ରମୁଖ ସଫେଇ କର୍ମଚାରୀଙ୍କ ପ୍ରସଙ୍ଗକୁ ଜାତୀୟସ୍ତରରେ ଆଗେଇ ନେବାରେ ଓଡ଼ିଶାର ନେତୃତ୍ୱକୁ ନେଇ ସେ ଗର୍ବିତ। ଜାତୀୟ ଗରିମା କର୍ମଶାଳା ବର୍ତ୍ତମାନ ପ୍ରତିବର୍ଷ ଜୁଲାଇ ମାସରେ ଅନୁଷ୍ଠିତ ହେବ, ଯାହା ଏହି ଉଦ୍ଦେଶ୍ୟରେ ଏକ ସ୍ଥାୟୀ ଜାତୀୟ ପ୍ରତିବଦ୍ଧତାର ପ୍ରତୀକ ଅଟେ।
ଶ୍ରୀମତୀ ପାଢୀ ସଫେଇ କର୍ମଚାରୀଙ୍କ ପାଇଁ ପ୍ରସ୍ତୁତ ଦୃଢ଼ ସାମାଜିକ ସୁରକ୍ଷା ଢାଞ୍ଚାର ଆବଶ୍ୟକତା ସମେତ ଦୁଇଦିନିଆ ଆଲୋଚନାର ମୁଖ୍ୟାଂଶ ଉପରେ ମଧ୍ୟ ଆଲୋକପାତ କରିଥିଲେ। ବୃତ୍ତିଗତ ସ୍ୱାସ୍ଥ୍ୟ ଏବଂ ନିରାପତ୍ତା (ଓଏଚଏସ) ମାନର ବୃଦ୍ଧି, ଚୁକ୍ତିଭିତ୍ତିକ ସଂସ୍କାର ମାଧ୍ୟମରେ ଅନୌପଚାରିକ ଶ୍ରମିକଙ୍କ ଆନୁଷ୍ଠାନିକତା ଏବଂ କଲ୍ୟାଣକାରୀ ଯୋଜନାରେ ପ୍ରବେଶ, କଲ୍ୟାଣ ବିତରଣକୁ ଟ୍ରାକ୍ କରିବା ଏବଂ ମହିଳା ଏବଂ ଟ୍ରାନ୍ସଜେଣ୍ଡର କର୍ମଚାରୀଙ୍କୁ ସମ୍ମାନ ଏବଂ ସୁରକ୍ଷା ସହିତ ପରିମଳ ଭୂମିକାରେ ଅନ୍ତର୍ଭୁକ୍ତ କରିବା ପାଇଁ ଟେକ୍ନୋଲୋଜି ଏବଂ ଡାଟା ସିଷ୍ଟମର ବ୍ୟବହାର ଉପରେ ସେ ଆଲୋକପାତ କରିଥିଲେ I
୨୦୨୦ ରେ ଓଡ଼ିଶା ସରକାରଙ୍କ ଦ୍ୱାରା ଆରମ୍ଭ ହୋଇଥିବା ଗରିମା ପଦକ୍ଷେପକୁ ଏକ ମଡେଲ ଭାବରେ ପ୍ରଶଂସା କରାଯାଇଛି। କର୍ମ କ୍ଷେତ୍ରରେ ନିରାପତ୍ତା, ଉଚିତ ମଜୁରି, ବୀମା, ସାମାଜିକ ସୁରକ୍ଷା ଏବଂ ସମାଜରେ ସମ୍ମାନ ସୁନିଶ୍ଚିତ କରି ମୁଖ୍ୟ ସଫେଇ କର୍ମଚାରୀଙ୍କ ଅଧିକାରର ସୁରକ୍ଷା କରିବା ଏହାର ଉଦ୍ଦେଶ୍ୟ। ପିପିଇ କିଟ୍, ସ୍ୱାସ୍ଥ୍ୟ ବୀମା ଏବଂ ନିୟମିତ ତାଲିମ , ଏକୀକରଣ ମାଧ୍ୟମର ୧୦,୦୦୦ ରୁ ଅଧିକ ପ୍ରମୁଖ ପରିମଳ କର୍ମଚାରୀଙ୍କ ପଞ୍ଜୀକରଣ କରାଯାଇଛି I
ସମ୍ମିଳନୀର ଏକ ଅଂଶ ଭାବରେ, ବିଭିନ୍ନ ରାଜ୍ୟ, ଆନ୍ତର୍ଜାତୀୟ ସଂଗଠନ, ଏନଜିଓ ଏବଂ ୟୁଏଲବିର ପ୍ରତିନିଧିମାନେ ବିଷୟଗତ ଅଧିବେଶନରେ ଅଂଶଗ୍ରହଣ କରିଥିଲେ I ସାମାଜିକ ସୁରକ୍ଷ୍ୟା , ମାନସିକ ସ୍ୱାସ୍ଥ୍ୟ ଏବଂ ଯାନ୍ତ୍ରିକ ପରିମଳ ଏବଂ ସୁରକ୍ଷା ପ୍ରୋଟୋକଲରେ ପରିମଳ କାର୍ଯ୍ୟାବଳୀ ପାଇଁ ସର୍ବୋତ୍ତମ ଅଭ୍ୟାସ ବୋଲି ମତ ପ୍ରକାଶ ପାଇଥିଲା।
ପୌର ନିର୍ଦ୍ଦେଶକ ଅରିନ୍ଦମ ଡାକୁଆ , ବିଭାଗର ଅତିରିକ୍ତ ସଚିବ ଦୁର୍ଗେଶ ନନ୍ଦିନୀ ସାହୁ ମଧ୍ୟ ଉଦଯାପନୀ ଅଧିବେଶନରେ ସେମାନଙ୍କର ମତ ରଖିଥିଲେ। ଏହି ଦୁଇଦିନିଆ ସମ୍ମିଳନୀ ରେ ୧୨ଟି ରାଜ୍ୟ ଓ ୩୪ଟି ଉନ୍ନୟନ ସଂସ୍ଥାର ପ୍ରତିନିଧିମାନେ ଅଂଶଗ୍ରହଣ କରିଥିଲେ। କର୍ମଶାଳାରେ ରାଜ୍ୟର ପ୍ରମୁଖ ପରିମଳ କର୍ମଚାରୀ, ପଞ୍ଚାୟତିରାଜ ବିଭାଗ ଏବଂ ଏସଟି ଏବଂ ଏସସିଏମବିସିସି ବିଭାଗର ଅଧିକାରୀମାନେ ମଧ୍ୟ ଯୋଗ ଦେଇଥିଲେ।
